OUR CLIENTS
புதிய பேருந்து வடிவமைப்பில் அசௌகரியம் நடத்துநருக்கு தனியாக இருக்கை இல்லையே!
புதிய பேருந்து வடிவமைப்பில் அசௌகரியம் நடத்துநருக்கு தனியாக இருக்கை இல்லையே! Posted on 28-Feb-2019 புதிய பேருந்து வடிவமைப்பில் அசௌகரியம் நடத்துநருக்கு தனியாக இருக்கை இல்லையே!

சென்னை, பிப்.28-

புதிய பேருந்து வடிவமைப்பில் அசௌகரியம் ஏற்பட்டுள்ளது. குறிப்பாகச் சொல்ல வேண்டும் என்றால் நடத்துநருக்கே தனியாக இருக்கை இல்லாத பரிதாப நிலைக்கு தள்ளப்பட்டுள்ளனர்.அதாவது இரு சீட்களில் ஒன்று நடத்துநருக்கு என்று சொல்லாமல் சொல்லப்படுகிறது.

ரைட் ரைட்.. என்றபடியே விசில் சத்தம் கேட்காமல் பேருந்து பயணத்தை நிறைவு செய்யவே முடியாது. அந்தவகையில் ஒரு பாதையில் புதிய பேருந்துகளை இயக்கும் போது பயணிகளுக்கு அது பல வகைகளில் வரப்பிரசாதமாக இருக்கும். ஆனால் அதுவே சற்று மோசமாக வடிவமைக்கப்பட்ட புதிய பேருந்தாக இருந்தால் அதில் பயணிக்கும் பயணிகளுக்கு சில மோசமான அனுபவங்களும் கிடைக்கலாம். அதுபோலத்தான் தற்போது சென்னையில் இயக்கப்படும் புதிய பேருந்துகளின் மோசமான வடிவமைப்பினால் ஒருசில அசௌகரியங்களை சந்தித்து வருகிறார்கள் பயணிகள். பயணிகள் மட்டுமல்ல, பாவம் நடத்துநரும் கூட. அதாவது பேருந்து என்றால் முன் பகுதியில் ஓட்டுநரின் இருக்கையும், பின் பகுதியில் நடத்துநருக்கு என தனி இருக்கையும் இருக்கும். ஆனால் இதில் நடத்துநருக்கான இருக்கையே இல்லை. இல்லை என்று அப்பட்டமாகச் சொல்லி விட முடியாது. இருக்கிறது. ஆனால் இல்லை. அப்படித்தான் சொல்ல வேண்டும். அதாவது நடத்துநருக்கான இருக்கையை வழக்கமான முறையில் அமைக்காமல், இரு நபர் அமரும் வகையிலேயே இருக்கையை அமைத்திருக்கும் பேருந்து வடிவமைப்பாளர்கள், இந்த இருநபர் இருக்கையின் ஒன்றில் நடத்துநர் அமர்ந்து கொள்ளலாம் என்று வாய்மொழியாகக் கூறிவிட்டார்கள். சரி, அது நடத்துநருக்கான இருக்கையாகவே இருக்கட்டும். ஆனால், அதில் மற்றொரு இருக்கையில் பெண் பயணிதான் அமர முடியும். இரு பயணிகள் நிம்மதியாக தாராளமாக அமர்ந்து வர இயலாத குறுக்கலான இருக்கையில் பெண் பயணியோடுதான் ஒரு நடத்துநர் அமர்ந்து வர வேண்டும். அவர் டிக்கெட்டுகளை கொடுக்கும் போது நிச்சயம் பெண் பயணி அசௌகரியமாகவே உணர்வார். இதனால் பிரச்னை கூட ஏற்படலாம். பொதுவாகவே அனைத்து இருக்கைகளும் மிகக் குறுகியதாக இருப்பதால் இரண்டு பெண்களும், இரண்டு ஆண்களுமே சௌகரியமாக பயணிக்க முடியாத நிலையில், இந்த கடினமான பயணத்தை தினந்தோறும் நடத்துநர் சந்திக்க வேண்டிய துர்பாக்கிய நிலைக்கு தள்ளப்பட்டுள்ளார்.
அவருக்கே அமர்வதற்கான இருக்கை பல பிரச்சனைகளை ஏற்படுத்தும் நிலையில், பேருந்தில் பயணிக்கும் பயணிகளும், என்ன இப்படி சீட் சின்னதாக இருக்கிறதே என்று அவரிடம் குறை கூறிவிட்டுச் செல்லும் போது அவர் யாரிடம் சொல்வது, என்ன செய்வது என்று தெரியாமல் திகைத்தேப் போய்விடுகிறார். இது குறித்து சென்னை மாநகராட்சிப் போக்குவரத்துக் கழக மூத்த அதிகாரிகளிடம் கேட்டபோது, இந்திய தர நிர்ணய ஆட்டோமோட்டிவ் ரிசர்ச் அசோசியேஷனால் வடிவமைக்கப்பட்டதுதான் இந்த புதிய பேருந்துகள். இவை அனைத்தையும் மத்திய அரசு தான் தயாரித்து அனுப்புகிறது. இது பற்றி நாம் எதுவும் கூற முடியாது என்கிறார். பேருந்தை வடிவமைக்கும் போது மாற்றி யோசியுங்கள். ஆனால் மாற்றி மாற்றி யோசித்து பேருந்தில் பயணிக்க வேண்டுமா? என்று பயணிகளை யோசிக்க வைத்து விடாதீர்கள்.
ஒருபுறம் புதிய பேருந்து என்று பயணிக்கும் பயணிகளுக்கு இருக்கையில் அமர்ந்துவிட்டு எழுந்து வெளியில் வர மிகவும் சிரமத்துக்கு உள்ளாக வேண்டிய பரிதாப நிலைக்கு தள்ளப்பட்டுள்ளனர். அத்துடன் பயணிகள் மிகவும் அதிகம் பயணிக்கும் வேளையில் நடத்துநர்கள் பேருந்தின் முன்பக்கத்தில் இருந்து பின்பக்கம் வரையில் பயணிகளுக்கு நடுவில் இடித்து கொண்டு டிக்கெட் கொடுத்து வருகின்றனர். பயணிகள் மிகவும் குறைந்து காணப்படும் நேரத்தில் தனது இருக்கையில் அமர்ந்தவாறு டிக்கெட் விநியோகம் செய்கின்றனர். இப்படி ஒருநாள் முழுவதும் பயணிகளுக்கு நடுவில் பயணித்து களைப்படையும் நடத்துநர்களின் பணி மிகவும் மகத்தானது என்றே சொல்லலாம். ஆனால் அவர்கள் அமர இடம் ஒதுக்காமல் புதிய பேருந்துகள் வடிவமைக்கப்பட்டது ஏன் என்றுதான் தெரியவில்லை என்கின்றனர் சமூக ஆர்வலர்களும், பயணிகளும். அத்துடன் இருக்கைகளை சற்று இடைவெளி விட்டு அமைக்க வேண்டும் என்றும் பயணிகள் தமிழ்நாடு அரசு போக்குவரத்து துறைக்கும், போக்குவரத்து துறை அமைச்சர் எம்.ஆர்.விஜயபாஸ்கருக்கும் கோரிக்கை விடுத்துள்ளனர். கட்டணம் மட்டும் தாறுமாறாக கூட்டிவிட்டு விட்டு சௌகரியத்தை ஏற்படுத்தி தராமல் அசௌகரியத்தை ஏற்படுத்தியிருப்பது ஏற்புடையதல்லை. இதை மனதில் வைத்து இனிவரும் காலங்களில் வடிவமைக்கப்படும் பேருந்துகள் நடத்துநருக்கு தனி இருக்கை, பயணிகள் வசதியாக அமர்ந்து செல்ல இடைவெளி விட்ட இருக்கைகளை நிறுவ வேண்டும் என்ற கோரிக்கை அரசுப் பேருந்துகளில் பயணிக்கும் பயணிகள் மத்தியில் வலுப்பெற்றுள்ளது. தமிழ்நாடு அரசு போக்குவரத்து கழகத்தின் நடவடிக்கைகளை பொறுத்திருந்து தான் பார்க்க வேண்டும்.

Label