OUR CLIENTS
காங்கிரஸ் மீது முதலமைச்சர் பாய்ச்சல்
காங்கிரஸ் மீது முதலமைச்சர் பாய்ச்சல் Posted on 01-Jul-2019 காங்கிரஸ் மீது முதலமைச்சர் பாய்ச்சல்

சென்னை, ஜூலை 01-

காவிரியின் குறுக்கே மேகதாது அணை கட்டப்படும் என்று கர்நாடகாவில் காங்கிரஸ் தலைவர் ராகுல்காந்தி பேசியதற்கு எதிர்ப்பு தெரிவித்தீர்களா என்று சட்டப்பேரவையில் காங்கிரஸ் எம்எல்ஏக்களிடம் முதலமைச்சர் பழனிசாமி கேள்வி எழுப்பினார்.

தமிழ்நாடு சட்டசபையில் குடிநீர் பிரச்னை தொடர்பான விவாதத்தில் முதலமைச்சர் எடப்பாடி பழனிசாமி விளக்கம் அளித்தார்.

காவிரி விவகாரம் தொடர்பாக முதலமைச்சர் பழனிசாமிக்கும், காங்கிரஸ் எம்எல்ஏக்களுக்கும் இடையே காரசார விவாதம் நடைபெற்றது. அப்போது பேசிய முதல்வர் பழனிசாமி,  மழை பொய்த்ததால் நிலத்தடி நீர்மட்டம் குறைந்துவிட்டது. இருந்த போதும், தமிழக அரசால் முடிந்தவரை தண்ணீர் விநியோகித்து வருகிறோம். தமிழகத்தில் குடிநீர் பஞ்சமில்லை, பற்றாக்குறை ஏற்பட்டுள்ளது.

காவிரி பிரச்னையில் கர்நாடகாவில் கூட்டணியாக உள்ள காங்கிரஸ் தமிழகத்துக்குத் தண்ணீர் பெற்றுத் தர அழுத்தம் கொடுத்ததா?

50  ஆண்டுகள் சட்டப் போராட்டம் நடத்தி காவிரி பிரச்சினையில் தீர்வு கண்டுள்ளோம்.


கர்நாடகாவில் நடந்த பொதுக் கூட்டத்தில் காங்கிரஸ் கட்சியின் தலைவர் ராகுல்காந்தி பேசிய போது மத்தியில் காங்கிரஸ் கட்சி ஆட்சிக்கு வந்ததும், காவிரியின் குறுக்கே மேகதாது அருகே அணை கட்டப்படும் என்றும், காவிரி மேலாண்மை ஆணையம் கலைக்கப்படும் என்றும் பேசியுள்ளார்.


ஏற்கனவே காவிரி நீர் பெறுவதில் சிக்கல் உள்ளது. இந்த நிலையில் ராகுல்காந்தி இவ்வாறு பேசியுள்ளாரே, இந்த பேச்சுக்கு எதிர்ப்பு தெரிவித்து காங்கிரஸ் எம்எல்ஏக்கள் யாராவது ஒருவர் குரல் கொடுத்தீர்களா? என்று முதலமைச்சர் பழனிசாமி கேட்டார்.


இதற்கு பதிலளித்த காங்கிரஸ் எம்எல்ஏக்கள்,  காவிரி நீரைக் கொண்டு வர வேண்டியது ஆளுங்கட்சியின் பொறுப்பு. ஆனால், அதனை செய்யாமல், காவிரி நீர் விவகாரத்தில் எதிர்க்கட்சியை குற்றம்சாட்டுவது எந்த விதத்தில் நியாயம் என்று கேள்வி எழுப்பினர்.

அரசின் நடவடிக்கைகளுக்கு காங்கிரஸ் முழு ஆதரவு தந்து வருகிறது. இதை தமிழக அரசு மறுக்க முடியுமா?  காவிரி விவகாரம் தொடர்பாக சட்டசபையில் தொடர்ந்து காரசார விவாதம் நடைபெற்றது.

Label