OUR CLIENTS
காவேரிப்பாக்கம் ஏரி உருமாறிய அவலம்!
காவேரிப்பாக்கம் ஏரி உருமாறிய அவலம்! Posted on 01-Jul-2019 காவேரிப்பாக்கம் ஏரி உருமாறிய அவலம்!

வேலூர், ஜூலை 1-

 900 ஆண்டுகள் பழமையுடன் 3,968 ஏக்கர் பரப்பளவில் பிரமாண்டமாக கடல் போல் காட்சியளித்த காவேரிப்பாக்கம் ஏரி கட்டாந்தரையாக மாறி உருமாறியுள்ளதை கண்டு விவசாயிகள் வேதனையில் ஆழ்ந்துள்ளனர்.

 தமிழகத்தை ஆண்ட பண்டைய மன்னர்கள் நீர்மேலாண்மையில் மிகுந்த அக்கறை காட்டினர் என்பதை இன்றும் காலத்தை வென்று சாட்சியம் கூறிக் கொண்டிருக்கின்றன பல சான்றுகள். இதில் கரிகாலன் கட்டிய கல்லணை இன்றைய தொழில்நுட்ப வல்லுனர்களையே வியப்பில் ஆழ்த்தி வருகிறது. இவ்வாறு நமது முன்னோர்கள் நமக்கு அளித்த நீர்மேலாண்மை கட்டமைப்புகளை காக்கத்தவறியதன் விளைவைதான் இப்போது தமிழகம் சந்தித்து கொண்டிருக்கிறது. இதற்கு சிறந்த உதாரணமாக விளங்குவதுதான் வேலூர் மாவட்டம் காவேரிப்பாக்கம் ஏரி. வேலூர் மாவட்டம் உள்ளடக்கிய தொண்டை மண்டலத்தில் பல்லவர்களால் கட்டமைக்கப்பட்ட மகேந்திரவாடி, செம்பரம்பாக்கம், மாமண்டூர், மகேந்திரவாடி, திருப்பாற்கடல், பல்லவனேரி, உதயேந்திரம், சதுப்பேரி என பல ஏரிகளும், சென்னையில் ஏற்படுத்தப்பட்ட பல ஏரிகளும் என பட்டியலிட்டால் பல ஏரிகள் காணாமல் போன பட்டியலுக்கு செல்லும். பல ஏரிகளின் நீர்வரத்து கால்வாய்கள் காணாமல் போய், ஏரிப்பரப்பில் பெய்யும் மழைநீரை மட்டுமே கொள்ளும் நிலையில் உள்ளன.

அந்த வகையில் கி.பி 7ம் நூற்றாண்டில் பல்லவ மன்னன் மூன்றாம் நந்திவர்மனால் வேலூர் மாவட்டத்திலேயே மிகவும் பெரிய ஏரியான காவேரிப்பாக்கம் ஏரி உருவாக்கப்பட்டது. ஏரியின் மொத்த பரப்பளவு 3968 ஏக்கர். இது இப்போதைய அளவு. அந்த காலத்தில் இதை விட பெரிது என்கிறார்கள் வரலாற்று ஆய்வாளர்கள். இவ்வளவு பிரமாண்டமான ஏரிக்கு பாலாற்றின் வெள்ளமே நீராதாரமாக விளங்கி வருகிறது. இதனை பற்றிய தகவலை 19ம் நூற்றாண்டில் இங்கிலாந்தை சேர்ந்த மிஸ்டர் பரித்ஸ்மித் என்பவர் 'தென்னிந்தியாவின் நீர்ப்பாசனம்' என்ற தனது புத்தகத்தில் குறிப்பிட்டுள்ளார்.

பாலாற்றில் இருந்து காவேரிப்பாக்கம் ஏரிக்கு நீர் வரும் வகையில் பிரமாண்டமான கால்வாய்கள் வெட்டப்பட்டிருந்தன. இவ்வாறு ஏரிக்கு வரும் தண்ணீரை நரி மதகு, சிங்க மதகு, மூல மதகு, பள்ள மதகு என 10 மதகுகள் வழியாக வெளியேற்றப்பட்டு கால்வாய்கள் மூலம் காவேரிப்பாக்கம், கொண்டாபுரம், கட்டளை, சேரிஅய்யம்பேட்டை, துரைபெரும்பாக்கம், பாணாவரம் உள்ளிட்ட 14 கிராமங்களுக்கு நேரடியாக தண்ணீர் பெறப்படுகிறது.

காவேரிப்பாக்கம் ஏரி மூலம் மகேந்திரவாடி, சித்தேரி உட்பட பல சிறிய, பெரிய ஏரிகள் கால்வாய்கள் மூலம் நீரை பெற்று அந்தந்த பகுதி விவசாயத்துக்கு பாசன வசதியை அளித்தன. தற்போது 6278 ஏக்கர் பரப்பளவு வேளாண் நிலங்கள் நீரை பெறுகின்றன. இத்தகைய சிறப்பு வாய்ந்த ஏரிக்கரையின் நீளம் 8.5 கிலோ மீட்டர். இதன் கரையின் அகலம் 3.5 மீட்டர். இக்கரையை பாதுகாக்க உள்பகுதியில் பெரிய பெரிய பாறைகள் ஒன்றன் மீது ஒன்றாக அடுக்கி பதிக்கப்பட்டுள்ளது. தற்போது இந்த ஏரி பொதுப்பணித்துறையின் பராமரிப்பில் உள்ளது.

காவேரிப்பாக்கம் ஏரிக்கு பாலாறு அணைக்கட்டில் இருந்து சுமார் 5 கிலோ மீட்டர் தூரத்திற்கு இருபுறமும் கருங்கற்கள் பதிக்கப்பட்ட கால்வாய் அமைக்கப்பட்டுள்ளது. இதன் மூலம் தண்ணீர் கொண்டுவரப்பட்டு ஏரியில் நிரப்பப்படுகின்றன. இவ்வாறு ஏரி முழுமையாக நிரம்பும்போது ஏரியின் மொத்த கொள்ளளவு உயரம் சுமார் 30.65 அடியாக இருக்கும். ஏரியானது ஒருமுறை நிரம்பி வழிந்தால் ஓராண்டுக்கு மூன்று போகம் பயிர் செய்ய முடியும்.இந்த ஏரி முழுமையாக நிரம்பி வழியும்போது ஏரியின் பாதுகாப்பை கருத்தில் கொண்டு, உபரிநீர் கடைவாசல் பகுதியில் உள்ள 58 ராட்சத மதகுகள் மூலம் வெளியேற்றப்படுகிறது. இவ்வாறு வெளியேற்றப்படும் நீர் பல ஏரிகளுக்கு சென்று அதன் பிறகும் உள்ள உபரி நீர் கொசஸ்தலை ஆற்றில் கலந்து கடலை நோக்கி செல்லும். ஆனால் இது பெருமைக்காக மட்டும் பேசப்படும் வார்த்தையாக இருக்கும் என்பதே விவசாயிகளின் குமுறல்.

இத்தனை சிறப்புகள் மிகுந்த ஏரி ஆங்காங்கே ஆக்கிரமிப்புக்கு உள்ளாக்கப்பட்டு அதன் பரப்பளவை கொஞ்சம் கொஞ்சமாக இழந்து வருகிறது. மேலும் இந்த ஏரி தனது ஆரம்பகால ஆழத்தை இப்போது கொண்டிருக்கவில்லை. பெருமளவு மண், மணல் சேர்ந்து தூர்ந்து போயுள்ளதால், பருவமழை காலங்களில் ஏரி நிரம்பும் வாய்ப்பு இருந்தும் போதிய தண்ணீர் சேமிக்க முடியாமல் வெளியேற்றப்படுகிறது. இதனால் மூன்று போகம் விவசாயம் செய்யக்கூடிய நிலை மாறி ஒரு போகம் மட்டும் விவசாயம் செய்யும் நிலைமைக்கு விவசாயிகள் தள்ளப்பட்டுள்ளனர். நிலத்தடி நீராதாரமும் கேள்விக்குறியாக்கப்படுகிறது. இத்தகைய சூழலில் கடந்த ஆண்டு பருவமழை பொய்த்து, கடும் வறட்சியும் அதனுடன் சேர தற்போது காவேரிப்பாக்கம் ஏரி வறண்டு கட்டாந்தரையாகி கண்போரை கண்ணீர் வடிக்கும் நிலைக்கு தள்ளியுள்ளது. இதற்கு காவேரிப்பாக்கம் ஏரிக்கான நீர்வரத்துக்கால்வாய்களின் ஆக்கிரமிப்புகள் மட்டுமின்றி, நீண்டகாலமாக ஏரி தூர்வாரப்படாததுமே காரணம். எனவே, காவேரிப்பாக்கம் ஏரியின் பழம்பெருமையை மீட்டெடுக்க ஏரியை ஆக்கிரமிப்பாளர்களிடம் இருந்து மீட்டு முழுமையாக தூர்வாருவதுடன், அதன் வரத்துக்கால்வாய்கள், இணைப்புக்கால்வாய்களை ஆக்கிரமிப்புகளில் இருந்து மீட்டு சீரமைக்க வேண்டும் என்று விவசாயிகள் கோரிக்கை விடுத்துள்ளனர்.

 

Label