OUR CLIENTS
ரியோ ஒலிம்பிக்கில் தடகள போட்டி இன்று தொடக்கம்
ரியோ ஒலிம்பிக்கில் தடகள போட்டி இன்று தொடக்கம் Posted on 12-Aug-2016 ரியோ ஒலிம்பிக்கில் தடகள போட்டி இன்று தொடக்கம்

ரியோ:
31-வது ஒலிம்பிக் போட்டி பிரேசில் நாட்டில் உள்ள ரியோ டி ஜெனீரோ நகரில் கடந்த 5-ந்தேதி கோலாகலமாக தொடங்கியது. இதில் 206 நாடுகளை சேர்ந்த 11 ஆயிரத்திற்கும் மேற்பட்ட வீரர், வீராங்கனைகள் பங்கேற்றுள்ளனர். நீச்சல், ஜிம்னாஸ்டிக்ஸ் பந்தயங்களில் அமெரிக்கா, சீனா, ஆஸ்திரேலியா உள்ளிட்ட நாடுகள் போட்டி போட்டு பதக்க வேட்டை நடத்தின. டென்னிஸ், பேட்மிண்டன், குத்துச்சண்டை, கோல்ப் உள்ளிட்ட போட்டிகள் நடந்து வருகின்றன.


இந்த நிலையில் மிகுந்த எதிர்பார்ப்புக்கு இடையே தடகள போட்டிகள் இன்று தொடங்குகிறது. ரியோ ஒலிம்பிக்கில் தடகளத்தில் மொத்தம் 47 தங்கப்பதக்கங்கள் வழங்கப்படுகின்றன. இதில் பெண்களுக்கு 23 பந்தயங்களும், ஆண்களுக்கு 24 பந்தயங்களும் அடங்கும். மின்னல்வேக வீரர் என்று அழைக்கப்படும் ஜமைக்காவின் உசேன்போல்ட்டின் ஓட்டத்தை காண ரசிகர்கள் தவமாய் தவம் கிடக்கிறார்கள். உலகின் அதிவேக வீரர் யார் என்பதை நிர்ணயிக்கும் 100 மீட்டர் ஓட்டத்தின் தகுதி சுற்று நாளையும், அரைஇறுதி மற்றும் இறுதிப்போட்டி நாளை மறுதினமும் அரங்கேறுகின்றன.

இந்தியாவை பொறுத்தவரை தடகளத்தில் 34 பேருடன் குதிக்கிறது. காமன்வெல்த் சாம்பியனான வட்டு எறிதல் வீரர் விகாஸ் கவுடா தொடர்ந்து 4-வது முறையாக அடியெடுத்து வைக்கிறார். ஒலிம்பிக் தடகளத்தில் அதிக முறை பங்கேற்கும் இந்தியர் என்ற பெருமையை அவர் பெறுகிறார். 2012-ம் ஆண்டு ஒலிம்பிக்கில் இறுதிசுற்று வரை வந்த 33 வயதான விகாஸ் கவுடா நம்பிக்கை நட்சத்திரமாக தெரிகிறார்.

தடகளத்தில் இந்தியாவின் பங்களிப்பு இதுவரை மெச்சும்படி இருந்ததில்லை. 1900-ம் ஆண்டு ஒலிம்பிக்கில் ஓட்டப்பந்தய வீரர் நார்மன் பிரிட்சார்ட் இரண்டு வெள்ளிப்பதக்கம் வென்றார். இந்தியா சார்பில் கலந்து கொண்டாலும் உண்மையில் அவர் இங்கிலாந்தை பூர்வீகமாக கொண்டவர். அதன் பிறகு ஒரு நூற்றாண்டு காலம் உருண்டோடி விட்டது. ஆனாலும் இந்திய வீரர், வீராங்கனைகள் தடகளத்தில் இன்னும் பதக்கத்தை நெருங்க முடியாமல் தவிக்கிறார்கள்.

விகாஸ் கவுடாவை தவிர்த்து, டுட்டீ சந்த் (100 மீட்டர் ஓட்டம்), ஸ்ரபானி நந்தா (200 மீட்டர் ஓட்டம்), டின்டு லூக்கா (800 மீட்டர் ஓட்டம்) ஆகிய இந்திய வீராங்கனைகளும் சிறிய அளவில் தாக்கத்தை ஏற்படுத்த வாய்ப்புள்ளது.

Label