OUR CLIENTS
கமலுக்கு கொலை மிரட்டல் விடுப்பவர்களை கைது செய்ய வேண்டும் : கேரள முதல்வர் பினராயி விஜயன் கண்டனம்
கமலுக்கு கொலை மிரட்டல் விடுப்பவர்களை கைது செய்ய வேண்டும் : கேரள முதல்வர் பினராயி விஜயன் கண்டனம் Posted on 06-Nov-2017 கமலுக்கு கொலை மிரட்டல் விடுப்பவர்களை கைது செய்ய வேண்டும்  : கேரள முதல்வர் பினராயி விஜயன் கண்டனம்

திருவனந்தபுரம், நவ.6-
நடிகர் கமலுக்கு கொலை மிரட்டல் விடுத்த இந்து மகாசபாவுக்கு கேரள முதல்வர் பினராயி விஜயன் டுவிட்டரில் கண்டனம் தெரிவித்துள்ளார்.

நடிகர் கமல்ஹாசன் தமிழ் வார இதழ் ஒன்றில் இந்து தீவிரவாதம் குறித்து கட்டுரை எழுதியுள்ளார். இதற்கு பா.ஜ.க., மற்றும் ஆர்.எஸ்.எஸ். அமைப்புகள் கடும் கண்டனம் தெரிவித்துள்ளன.

இதற்காக உத்தரப் பிரதேச மாநிலம் பனாரஸ் நகரில் கமல் மீது குற்றவியல் சட்ட பிரிவுகள் 500, 511, 298, 295(a), 505(c) ஆகிய 5 பிரிவுகளில் வழக்குப் பதிவு செய்யப்பட்டுள்ளது.

நடிகர் கமல் தீவிரவாதிகளின் ஆதரவாளர் என பாஜக தேசிய செயலாளர் எச்.ராஜா கடுமையாக விமர்சித்திருந்தார்.  கமலின் இந்த கருத்து நாடும் முழுவதும் விவாதம் செய்யும் அளவுக்கு சென்று விட்டது. 

கமலின் கருத்து குறித்து இந்து மகாசபையின் துணைத் தலைவர் பண்டிட் அசோக் ஷர்மா கூறுகையில்:   இந்து மதம் குறித்து பேசும் கமல்ஹாசன் உள்ளிட்டோரை கொலை செய்ய வேண்டும். இல்லாவிட்டால் தூக்கிலிட வேண்டும். இதுதான் அவர்களுக்கு சரியான தண்டனையாக இருக்கும்.  இந்து மதத்தின் மீது அவதூறாக பேசுபவர்களுக்கு இந்த புண்ணிய பூமியில் வாழ உரிமை கிடையாது. அவர்களுக்கு மரணம் ஒன்றுதான் தண்டனை என்று பண்டிட் அசோக் கடுமையாக பேசியிருந்தார்.  

இந்த பேச்சு மக்களை அதிர்ச்சியில் ஆழ்த்தியது.  இந்து மகாசபாவின் பேச்சுக்கு கேரள முதல்வர் பினராயி விஜயன் கண்டனம் தெரிவித்துள்ளார்.  இதுகுறித்து அவர் டுவிட்டரில் தனது தொடர் பதிவுகளில் கூறுகையில்,   கமல்ஹாசனின் பேச்சுரிமைக்கு எதிராக இந்து மகாசபா தலைவர்கள் கொலை மிரட்டல் விடுப்பது கடும் கண்டனத்துக்குரியது.  இதுபோன்று கொலை அல்லது படுகொலை மிரட்டல் விடுக்கும் மத வெறியர்கள் மற்றும் தீவிர சிந்தனையாளர்களை உடனடியாக கைது செய்ய வேண்டும். மகாத்மா காந்தி, பன்சாரே, கல்புர்கி, தபோல்கார் மற்றும் கவுரி லங்கேஷ் ஆகியோருக்கு நடந்தது என்ன என்பது இந்த நாடே அறியும் என்று முதல்வர் பினராயி விஜயன் தெரிவித்துள்ளார்.

Label