OUR CLIENTS
கார்ட்டூனிஸ்ட் பாலா மீதான வழக்கு விசாரணைக்கு இடைக்கால தடை
கார்ட்டூனிஸ்ட் பாலா மீதான வழக்கு விசாரணைக்கு இடைக்கால தடை Posted on 16-Nov-2017 கார்ட்டூனிஸ்ட் பாலா மீதான வழக்கு விசாரணைக்கு  இடைக்கால தடை

மதுரை, நவ. 16
கார்ட்டூனிஸ்ட் பாலா மீதான வழக்கு விசாரணைக்கு இடைக்கால தடை விதித்து உயர் நீதிமன்ற மதுரைக் கிளை உத்தரவிட்டுள்ளது.

கந்துவட்டிக் கொடுமையால் ஒரே குடும்பத்தைச் சேர்ந்த 4 பேர் தீக்குளித்து உயிரிழந்த சம்பவத்தை கார்ட்டூனாக வரைந்து முகநூல் பக்கத்தில் வெளியிட்டதற்காக, தன் மீது நெல்லை போலீசார் பதிவு செய்த வழக்கை ரத்து செய்யக் கோரி கார்ட்டூனிஸ்ட் பாலா உயர் நீதிமன்ற மதுரைக் கிளையில் மனு தாக்கல் செய்தார்.   மனுவில், கந்து வட்டி கொடுமையால் நெல்லை ஆட்சியர் அலுவலக வளாகத்தில் இசக்கிமுத்து குடும்பத்தார் 4 பேர் அக்டோபர் 23-ம் தேதி தீக்குளித்து பலியாகினர்.

இது குறித்து அக்டோபர் 24-ம் தேதி ஒரு கார்டூன் வரைந்து எனது முகநூல் பக்கத்தில் வெளியிட்டேன். அதில் முதல்வர், ஆட்சியர், காவல் கண்காணிப்பாளர் ஆகியோர் அரை நிர்வாணத்தில் நின்று தீக்குளிப்பு சம்பவத்தை பார்ப்பதுபோல சித்தரித்திருந்தேன்.   இந்நிலையில் நெல்லை ஆட்சியர் புகாரின் பேரில், நவம்பர் 5ஆம் தேதி போலீசார் என்னை சென்னையில் கைது செய்தனர். நான் எந்த குற்ற செயலிலும் ஈடுபடவில்லை. என்னைக் கைது செய்தது இயற்கை நீதிக்கு முரணானது. ஆகவே, என் மீதான வழக்கை ரத்து செய்ய வேண்டும் எனக் கோரியிருந்தார்.

இந்த மனு நீதிபதி எஸ். சுந்தர் முன்பு நேற்று விசாரனைக்கு வந்தது.   அரசு தரப்பில் ஆஜரான வழக்கறிஞர் முதல்வர், ஆட்சியர், காவல் கண்காணிப்பாளரை அரை நிர்வாணத்தில் மனுதாரர் வரைந்தது சட்டத்திற்கு புறம்பானது. எனவே அவர் மீதான வழக்கை ரத்து செய்யக்கூடாது என வாதிட்டார்.   ஆனால், அரசு தரப்பு வாதத்தை நிராகரித்த நீதிபதி மனுதாரர் மீதான வழக்கு விசாரணைக்கு இடைக்கால தடை விதித்தார். மேலும், நெல்லை மாவட்ட குற்றப்பிரிவு காவல் ஆய்வாளர் பதில் மனு தாக்கல் செய்ய உத்தரவிட்டு வழக்கு விசாரணையை ஒத்திவைத்தார் நீதிபதி எஸ். சுந்தர்.

Label