OUR CLIENTS
சத்துணவு திட்டத்தில் முட்டையை நிறுத்துவதா? : மு.க.ஸ்டாலின் கடும் கண்டனம்
சத்துணவு திட்டத்தில் முட்டையை நிறுத்துவதா? : மு.க.ஸ்டாலின் கடும் கண்டனம் Posted on 21-Nov-2017 சத்துணவு திட்டத்தில் முட்டையை நிறுத்துவதா?  : மு.க.ஸ்டாலின் கடும் கண்டனம்

 சென்னை, நவ.21
பள்ளி மாணவர்களுக்கான சத்துணவுத் திட்டத்துக்கு வழங்கும் முட்டையை முழுமையாக நிறுத்த எடுத்துவரும் நடவடிக்கைக்கு தி.மு.க. செயல் தலைவர் மு.க.ஸ்டாலின் கடும் கண்டனம் தெரிவித்துள்ளார்.

தி.மு.க. செயல் தலைவர் மு.க.ஸ்டாலின் வெளியிட்டுள்ள அறிக்கையில் கூறி இருப்பதாவது:-  தமிழகத்தில், “2 வயது குழந்தைகள் முதல் சுமார் 69 லட்சம் பள்ளி மாணவ-மாணவியர்கள் பயன்பெறும் வகையில் செயல்படுத்தப்பட்டு வரும் சத்துணவுத் திட்டத்திற்குத் தேவையான முட்டைகளை கொள்முதல் செய்வதில் ‘குதிரை பேர’ அ.தி.மு.க. அரசு அலட்சியம் காட்டியிருப்பதால், சத்துணவு மையங்களுக்கு முட்டைகள் வழங்கப்படவில்லை”, என்ற செய்தியறிந்து அதிர்ச்சியடைந்தேன். பொறுப்பற்ற அதிமுக அரசின் இச்செயலுக்கு திமுகவின் கடும் கண்டனத்தை தெரிவித்துக் கொள்கிறேன்.

முதன்முதலில், 1989-ம் ஆண்டு முதல் சத்துணவுத் திட்டத்தில், இரு வாரங்களுக்கு ஒரு முட்டை வழங்கவும், பிறகு 1998-ல் வாரத்திற்கு ஒரு முட்டை வழங்கவும் உத்தரவிட்டு, பள்ளிக் குழந்தைகளுக்கு ஊட்டச்சத்து கிடைக்கவும், வறுமையால் பள்ளிக்கூடங்களில் இருந்து நிற்கும் குழந்தைகள் மீண்டும் பள்ளிகளில் சேரவும் வழி வகுத்த பெருமை தலைவர் கலைஞரையே சாரும்.  சிறப்புக்குரிய இந்த சத்துணவுத் திட்டத்தில் ‘கலவை சாதம்’ போடுவதாக குழப்பத்தை ஏற்படுத்திய அதிமுக அரசு, சத்துணவு ஊழியர்களின் சம்பள உயர்வு உள்ளிட்ட கோரிக்கைகளை உதாசீனப்படுத்தியது.

முட்டை விலை குறைவாக இருந்தபோது, அதிக விலை கொடுத்து முட்டைகளை கொள்முதல் செய்து, சத்துணவிற்காக வாங்கப்படும் முட்டைகளுக்கான டெண்டரிலும் முறைகேடுகளுக்கு வழிவகுத்தது. குழந்தைகளுக்கு சத்துணவு வழங்கும் அமைப்பாளர்கள், சமையல்காரர்கள், ஊழியர்கள் நியமனத்திலும் மாவட்ட அளவில் லஞ்சம் தலைவிரித்தாடியது.  பல சத்துணவு அமைப்பாளர்கள் நியமனத்தில் நடந்த முறைகேடுகள் உயர்நீதிமன்ற விசாரணையில் வெளிச்சத்திற்கு வந்தது. இப்படி அனைத்து வகையிலும் சத்துணவுத் திட்டத்தை சீரழித்துள்ள ‘குதிரை பேர’ அரசு இப்போது, “முட்டை விலை அதிகமாகி விட்டது”, என்று காரணம் காட்டி முட்டைகள் கொள்முதலை நிறுத்தி, சத்துணவுத் திட்டத்தில் முட்டை வழங்கும் திட்டத்தை முழுமையாக நிறுத்த நடவடிக்கை எடுத்து வருவது வேதனையானது.

சத்துணவுத் திட்டத்தில் இந்தக் குழப்பநிலை நீடிப்பது எதிர்கால சமுதாயத்தையே வீழ்த்தக்கூடிய படுபாதகச் செயல் என்பதை தெரிவித்துக் கொள்ள விரும்புகிறேன். ஆகவே, உடனடியாக போதிய முட்டைகள் கொள்முதல் செய்து, ஏற்கனவே நடைமுறையில் உள்ளபடி சத்துணவுத் திட்டத்தில் முட்டைகள் வழங்குவதோடு, சமூகநலத்துறைச் செயலாளர் மற்றும் தலைமைச் செயலாளர் உள்ளிட்டோர் பள்ளிக் குழந்தைகளுக்காக செயல்படுத்தப்படும் சத்துணவுத் திட்டத்தைச் செம்மையாக நடத்துவதிலும், மாணவ மாணவியரின் உடல் ஆரோக்கியத்திலும், கல்வி முன்னேற்றத்திலும் கூடுதல் கவனம் செலுத்தவும் வேண்டும் என்றும் வலியுறுத்துகிறேன்.  இவ்வாறு மு.க.ஸ்டாலின் கூறியுள்ளார்.

Label