விவசாயி மீது தாக்குதல் நடத்திய சம்பவம்
சி.ஆர்.பி.எப் வீரருக்கு 5 ஆண்டுகள் தண்டனை

அரூர், பிப். 10: 
விவசாயி மீது தாக்குதல் நடத்திய சம்பவம் தொடர்பான வழக்கில் சிஆர்பிஎப் வீரர் சக்திவேல் (36) என்பவருக்கு 5 ஆண்டுகள் தண்டனை வழங்கி அரூர் சார்பு நீதிமன்றம் புதன்கிழமை தீர்ப்பு வழங்கியது. 

தருமபுரி மாவட்டம், அரூர் வட்டம், கூத்தாடிப்பட்டி கிராமத்தைச் சேர்ந்த விவசாயி பொன்னுசாமி மகன் சிவா. இவர், கடந்த 13.3.2016ல், தமது விவசாய நிலத்தில் தண்ணீர் பாய்ச்சி கொண்டிருந்தாராம். அப்போது, பக்கத்து விவசாய நிலத்தைச் சேர்ந்த சி.ஆர்.பி.எப் வீரர் சக்திவேல் மற்றும் விவசாயி சிவா ஆகியோரிடையே தகராறு ஏற்பட்டதாம். 

இந்த தகராறில் சிவா, அவரது தந்தை பொன்னுசாமி ஆகியோர் மீது சக்திவேல் மற்றும் அவரது குடும்பத்தினர் தாக்குதல் நடத்தியதாக கூறப்படுகிறது. இந்த வழக்கில் சக்திவேல் உள்ளிட்ட 7 பேர் மீது, அரூர் போலீஸார் கொலை முயற்சி வழக்கு பதிவு செய்தனர். 

இது குறித்த வழக்கு அரூர் சார்பு நீதிமன்றத்தில் நடைபெற்றது. இந்த வழக்கை விசாரித்த அரூர் சார்பு நீதிமன்ற நீதிபதி எச்.முகமது அன்சாரி, சி.ஆர்.பி.எப் வீரர் சக்திவேலுக்கு 5 ஆண்டுகள் கடுங்காவல் தண்டனையும், ரூ. 30 ஆயிரம் அபராதம் விதித்து உத்தரவிட்டார். மேலும், இந்த வழக்கில் இருந்து கூத்தாடிப்பட்டியைச் சேர்ந்த அய்யாக்கண்ணு, சுரேஷ், நல்லத்தான், சரவணன், மாது, தனலட்சுமி ஆகியோர் விடுதலை செய்யப்பட்டனர். இந்த வழக்கில் அரசு தரப்பில் வழக்குரைஞர் சி.முத்துராஜா ஆஜரானார்.